البوست التعريفي بمادة الباطنة الخمجية
سلااام 😃
باقي 3 أيام وبتخلص العطلة الطويلة 😌.. لهيك رح نبلش معكن بجولة تعريفية مختصرة لمواد هالفصل، بس اكبسوا على هاد الهاشتاغ #Dream_Team_4thلتشوفو كل البوستات ✌
--------------------
طبعاً الشغلات الجديدة هالفصل بتشمل:
◀امتحان سريري بالستاجات عليه 20 علامة مع إلزامية الحضور.
◀إضافة مواد (باطنة خمجية_غدية وتغذية_أورام_ أشعة) وحذف (الجلدية والأطفال والباطنة الرثوية).
◀كل مادة باطنة عليها 100 علامة مع عدد الساعات نفسو بالاعوام السابقة يعني ما رح ينعطى شي ضخم هالسنة عكس الاشاعات :3
◀الأشعة رح ندرسها بالسنتين الرابعة والخامسة بحيث كل فصل مناخد منها الشغلات اللي بتخدم باقي المواد .. والامتحان فيها بكون بنهاية الفصل الثاني فقط.
----------------------
وهلأ رح نبلش بأول مادة اللي هيي #الباطنة_الخمجية .. أغلب الطلاب كانو يعتبروها من أصعب البواطن لأنو كانت تنعطى بالفصل الثاني بالسنة الخامسة وبكونو الطلاب نسيانين معلومات الأحياء الدقيقة والطفيليات ... أما حالياً لازم تشوفوها الأسهل لأنكن ما شالله باصمين الجراثيم والطفيليات 😜
---------------------
المادة بتحكي عن إنتانات أجهزة الجسم المختلفة مُصنفة حسب العوامل الممرضة، وبتختلف عن الجراثيم والطفيليات بتركيزها على المظاهر السريرية للأمراض الإنتانية وعلاجها أكثر من تركيزها على صفات العوامل الممرضة وخصائصها الدقيقة (يعني مافي تفاصيل وشكل العامل الممرض وطولو وعرضو وارتفاعو 😌)
--------------------
للمادة ساعتين نظري أسبوعياً .. وبوصل عدد المحاضرات للـ 23 أقصى حد، بيعطيها دكتورين ع الشكل التالي:
⬅د.نزار ضاهر (عطانا بالأعراض والتشخيص):
بيعطي عادة 14 محاضرة عن: الصدمة الإنتانية، العنقوديات، المطثيات، الإسهال الخمجي، السالمونيلا والبروسيلا، السحائيات والكليبسلا، الجراثيم الأليفة بالجهاز التنفسي، الزوائف، الأمراض المنقولة بالجنس، الأوالي، أخماج الفيروسات.
⬅د.وحيد رجب بك :
بيعطي حوالي 6 محاضرات عن: الملتويات، الريكتسيات والمفطورات، الفطور، تتمة الأوالي، الديدان.
⏪ ستاج المادة عبارة عن 40 ساعة (يعني أسبوعين) بمشفى المواساة، بيعطوه نفس الدكاترة والحضور مفيد .. وبتعرفو التفاصيل أكتر بس ينزل توزيع الفئات.
⏪ طبعاً المادة لازمها متابعة خلال الفصل ولو بس قراءة بتركيز .. والدورات مفيدة لمعرفة أسلوب الدكاترة (بحال ضلو نفسن طبعاً)
------------------
🌸 رح يكون معكن خلال الفصل بالمحاضرات والملاحق وكلشي ممكن يفيد بهي المادة فريق الباطنة الخمجية
ربا النابلسي _ محمد خير دياب _ رهام بريجاوي _ مجدولين الخطيب
#Dream_Team_4th
ليست هناك تعليقات:
إرسال تعليق